الصفحة الرئيسية › متفرّقات

متفرّقات خاطرة: شنية الدنيا بلاش بيها .. ؟

قام ... مع أوّل ضحكة جابتها النّسمة ...

مع أوّل عصفور غنّالو و حيّرلو مواجعو في آخر حلمة ...

حلّ عينيه مع أوّل ريحة خرجت من ززوة القهوة ...

بوسة على جبينو رجّعتلو الدّنيا تجري في جواجيه ...

 

نفّض الدّمعات و الشّهقات على قليّبو الرّهيف ...

و طار مع صوت فيروز الّي خرج يمسحلو في همّ الّليل و عرق الفجر

يتبسّم مع كيفك انت كي يسمعها في راديون الكوميدينو ...

و يتفكّرها و يتفكّر صوتها يلهج بيه و يسأل عليه ...

 

لا رفّاي يتكتك و لا تلفزة تشخنن ...

راديو موجتو من موجة بحرو و كلامو من كلام عمرو ..

غناياتو تسطّرلو وحدة وحدة أيّاماتو ..

 

لا أمبولة توجعلو عينيه و لا ضو يقلّقلو ظلامو ...

لمعة ... ولاّ نجمة ..حتّى شمس تدخل من شبّاكو و تنوّرلو في لحظة صباحو ..

 

مّيمتو ايديها تتمدّ و تحطّ كفّها في كفّو و تعطيه ما كتب ربّي ..

يرجف و يهبّط راسو كلّ مرّة وقت يتفكّر الّي العيد الّي فات و الّي قبلو و الّي قبلو ما جابلها كان بوسة و تعنيقة ..

 

فليّساتو في ايدو و ثنيتو قدّامو و صوتو يدندن بوحدة من غناياتو نسى اسمها و نسى كلامها و تفكّر كان روحها ..

نهيّرو قهيوة و قعيّدة مع أصحاب عمرو قسمو الخبز و الهمّ و الضحكة و الدّنيا بالّي فيها ..

 

تبسيمتو على وجهو وين ما  مشى ، مالا يموتش كي ما عندوش باش يشري ذمايم النّاس ؟

يموتش كي ما عندوش الكلام السّفيه و التّبلعيط ؟

يموتش خاطر دنيتو مازالت مزيانة و ريحة ورداتو مازالو فايحين ؟

يموتش خاطر مازال يقوم فرحان و يستنّى وقتاش تتعدّى غناية فيروز بالصّدفة في الرّاديو ؟

 

مش لازم منها القهوة اليوم ..

الحومة زاهية  و ساكتة و قليّبو متوحّشها هي ..

حقّ الدخان يجيبلها بيه وردة ..

بالكشي تستنّى فيه في آخر الشّارع ...

آشنيّة الدّنيا بلاش بيها ؟

 

بقلم ياسين مالوش